COMMON CARP TUI TIR DAN


              Ram leh hnam an intodelh a, ram dangte pur ngai lova an mamawhnaa an intodelh chuan ram changkanga ngaih an ni thin. Keini ram pawh hmasawn tumin tan kan la mek a, mipuiten kan tih tur theuh kan hriata, kan tih chuan hun rei loteah ram intodelh kan ni ve thei ngei ang. Chung zinga zoram sangha khawi tuten kan tih ve theih kawng khat tunah hian kan sawi dawn a ni.


              Sangha khawi hian tunhma lam aiin mite ngaihven a hlawh sawt hle a.Tun kum reilote chhung pawh hian sangha dil siam nasa takin an pung a ni. Amaherawhchu, sangha khawitute hian tunhma atanga harsatna kan tawh thi n chu mahni duh ang leh mamawh ang tawk sangha chi dila dah tur kan nei lo thin. Sangha khawi chi thenkhat Major Carp hote hi chu a chi siam chhuah dan a hautak deuh hlek a. Amaherawhchu, keimahni pawhin harsa lotea a chi kan siam ve mai theih Common Carp chi siam dan tunah hian kan sawi dawn a ni.


              Common Carp hi sangha tuarchhel tak leh tui duh tak mai a ni a. Hriatloh hlanin dilah Common Carp note hmuh tur an lo awm ve leh mai thin. Amaherawhcu, hetianga an mahni a khuahkhirhna hnuai ni lova an lo tui mai chuan a note a keu tlemin, a keu chhun te pawh chu an hrisel vaklo thin a hriat a ni a. Chuvangin heng kan sawi tur atang hian hrisel zawk leh tam zawka Common Carp chi kan tharchhuah theih dan tur zir chhuah theuh i tum ang u.

   I. A TUI HUN:    Common Carp hi kumtluan deuh thawin an tui thei a. Amaherawhchu, an tui tam zual lai (peak breeding season) chu tum hnih January-March leh june-August chhung hi a ni.

   II. A TUI TUR THLAN :    A pa puitling chu a dulah han hmehin, a kua atangin thil tui var a lo chhuak thin. Tin, a dul kua hi a awmna a thukin a khuar lek lek a. A nu-ah erawh chuan a dul kua hi a pawrh chhuak deuhin a lang pawnlang hle. Tin, a dul hi a puar lian hle thin. A tui tur hian a hrisel leh a lian tha tha thlanchhuah tur a ni.

   III. A TUI TUR DAH HRAN :    Sawi tak angin Common Carp te hi an mahnia awlsam taka an tui mai theih avangin a nu leh a pa puitling tawh kan sawi tak ang te kha thlan chhuah a, a nu leh a pa chu dil hrang ve veah dah hran tur an ni. Dil dah hranna tur kan nei thei lo a nih pawhin mau leh thildang hmangin dil chu daidangin a nu leh a pa chu a dah hran mai theih a ni. An tui hun hma, rei lo berah thla hnih hma lam tal lo dah hran tur an ni. Chumi awmzia chu November emaw April thla velah emaw a tui tur chu dah hran tur an ni.


              Tin, heng a tui tur kan dah hran te hi chaw uluk taka pek tur an ni. Wheat vai leh oil cake a buk inzatin an taksa buk rih zawng hmun zaa thena hmun hnih emaw hmun thum emaw a rit pek tur a ni. Hetianga chawa chawm that an nih chuan an hriselin an tui tha a, an tui keu pawh a tha in a hrisel zawk bawk a ni. Tin, a tui tur kan dahna dilah hian tui hnim leh thil hnawk dang a awm palh a nih chuan then fai nghal zel tur a ni.

   IV. A TUI TIR DAN :    A tui turte tha taka kan chawm hnuah breeding season a rawn thlen chhoh tan chuan lena hrutin tui mai thei tura kan ngaihte chu thlan chhuah a, a la puitling tawk lo an dul la kiar tawk lo emaw te chu dila chhuah lehin a puitlingte chu a nu pakhat zelah a pa pahnih emaw pathum nen emaw a dah kawp tur a ni . A tui tur dahna atan hian happa hman theih ni ngei se. Happa chu thosilen ang taka thui a ni a, markin puan te pawh hian a thui mai theih ang. A tlangpuiin a tui tur set khat i.e a nu pakhat leh a pa 2-3 vel emaw chu happa a dung 2.5m, a vang 1.25m, a san zawng 1m a zau velah dahin a leng tawk vel a ni. Happa hi dil chhungah thosilen a letling zawnga zar ang maiin mautlawnah emaw tawn beh a, zar tur a ni. Happa hi tui chim veka zar tur a ni lova, a chunglam tui chim loh chin 1-2ft vel dahawl tur a ni.


              Common Carp tuite hi a ban avangin an lo tui huna a tui behna tur tui hnim emaw happa chhungah hian dah tel tur a ni. A tui behna tur hnahte hi a hmasain fai taka sil phawt tur a ni. Tin, a pui kan dah aia a leta rit . i.e a pui 1kg kan dah chuan hnim hnah chu 3kgs happa ah chuan dah luh tur a ni, Hengte hi happa chhungah rual taka chap parh tur a ni.


              Tichuan happa chhungah chuan a tui tur a nu leh a pate chu tlai lamah dah luh tur an ni a. a tuk zingah chuan an lo tui tawh mai thin a, khua a lum leh vawh a zirin a tlai hret thei bawk . A tlangpuiin darkar 10-12 a duh deuh ber hetianga a pui leh a pa puitling tha ngat kan tui tir chuan an tui zawng zawng zaa 80 chu a tui tha (fertilized egg) ah a lo insiam thin. Dan naranin a pui hrisel tha leh puitling tha (fully manure)1kg hian a tui tha nuaikhat lai a tui thei a ni. Tin, happa chhunga tui tir kan thei lo emaw , a tam deuh hlek vawikhata tui tir kan duh chuan hnim hnah leh tui hnim silfai sa te chu maua killi neia tawnkhwm chhungah dilah chuan dah ila, a tui tur ten an pankhawm a, an tui mai thin bawk.

   V. A TUI KEU :    A tui turte an tui zawh chuan sanghate chu dimtein happa a tang chuan lakchhuah a, dilah dah tawh tur an ni. Tin, a tui behna hnah pawh chu dimtea lakchhuah a happa chidang deuh hatching happa an tih mai a thuah hnih neiah dah tur an ni. Common Carp tuite hi an keu har a, khua a vawh deuh phei chuan nili hnuahte a keu theih chauh a vangin an tui hi hatching happa chhungah ngei keu tir ila, a lo eichhe thin tute lakah a him zawk ang. Hatching happa pawn zawk chu a hmaa happa a tui nana hman ang kha a ni a, a chhung lam zawk happa chu a te zawkin thosilen puan anga len awng sin a thui a ni. A tlangpuiin hatching happa 1.8 x 1 x 1m a zauah hian a tui behna hnah 1kg vela rit a dah theih . Chung chu happa chhung zawkah chuan dahin khawlum leh vawh a zirin ni 2-4 velah emaw a lo keu anga, chung chuan happa chhung zawk atanga hleuh chhuakin a pawn zawkah an rawn hleuh chhuak thin. An awmbawra thil pawng (yold sac) an chaw bawma chaw an ei zawh thlengin happa-ah chuan dah tur a ni a. Chumi hnuah chuan nursery tha taka buatsaih lawkah chuan dah tawh tur a ni.


   Hetianga uluk taka kan tui tir chuan mahni mamawh tawk mai bakah sangha hrisel zawk khawi tur kan lo nei thei dawn a ni.

3

Download